Idupka baru Sarawak Rangers kena ngangkat dagang temuai

Leftenan Kolonel (B) Robert Rizal Abdullah minta perintah ngidupka baru Sarawak Rangers ti udah kala tebilang tebilanag ngetanka menua sebedau Malaysia ditumbuhka suba.Ku iya, Sarawak Rangers ke baru tu enti ditumbuh ukai dipadu nyaga pengelikun menua tang dikena ngangkatka industri dagang temuai kelimpah ti dikena ba pengerami besai.
“Enti Sarawak Rangers dikemendarka baru engka sida tu tau diasuh ngena gari tradisional pejuang Iban,” ku iya ba pengawa nguburka baru 21 rangkah bujang berani ba palan Tugu Bujang Berani ditu, lemai kemari.
Ku Rizal ti meri penemu pasal pengawa mindahka 21 bujang berani ari Semenanjung Malaysia enggau Singapura ngagai menua tu madahka, perambu nya enda patut enda ulih dikemendarka.
“Ambika banding Johor pan bisi Johor Army,” ku iya.
Ngenang pengawa deka mai 21 rangkah bujang berani ku iya, berengkjah ari taun 2007.
“Tu bepun ari aku meda siti kubur iya nya kubur bujang berani ba sebengkah blog baka ke peminta (dikuburka baru).
“Kubur nya ba tisi jalai ti sekut,” ku iya.
Ba mata aku ku iya, nya chukup ngenyinuka lalu enda setipak enggau siku bujang berani ti berambunka nyawa ngetanka menua.
“Berindik ari Tgu Bujang Berani tu, aku ngarapka tu ulih ngangkatka tikas penegap ati ti ukai semina ba bansa Iban tang bansa kebukai,” ku iya.
Iya mega enda besetujuka ulah sekeda orang ke deka ngaga penyarut maya menua diatu ke benung likun sereta lantang.
“Nembiak rebak baru kelebih agi sida ke deka ngenataika penyarut patut berasai temegah ati ngagai pengelantang diatu,” ku iya.